Descubre Cambados

Situado na ría de Arousa, a máis extensa das rías galegas, e no val do Salnés que enxalzara Valle-Inclán, atópase o municipio de Cambados: un histórico enclave esculpido en granito, considerado un dos destinos turísticos máis belos, admirados e interesantes de Galicia. Merece unha detida visita para contemplar os seus pazos e casas nobres, distribuídas ao longo das tres antigas e señoriais vilas de Fefiñáns, Cambados e San Tomé, as súas belas prazas, as rúas empedradas, a rede de museos…

No s. IX Cambados sufría os ataques de viquingos e normandos debido á súa situación privilexiada no centro da comarca do Salnés, cunha costa baixa, areosa e con augas tranquilas, que reúnen unhas excelentes calidades para a navegación. Esta loita da poboación valeulle para que no ano 1170 Fernando II, Rei de León, lle concedera o título de “Moi Leal Vila” iniciándose entón un período de esplendor, que queda reflectido na multitude de pazos existentes no municipio pertencentes principalmente ao s. XVII e o s. XVIII.

As dimensións, xunto cos escudos que exhiben, ademais das torres, solainas, capelas e xardíns, fan dos pazos construcións admirables. Como di o refrán, “se ten pombal, capela e ciprés, pazo é“.

En Cambados naceron galegos ilustres como Ramón Cabanillas, coñecido como o Poeta da Raza, pola súa poesía contra as inxustizas sociais dedicando tamén versos á pesca e a vendima; así como os grandes escultores Francisco Asorey, Narciso Pérez, Francisco Leiro e Manolo Paz.

Tamén residiron na vila outros personaxes importantes como os escritores Emilia Pardo Bazán, Ramón María del Valle-Inclán ou o rexionalista Alfredo Brañas, quen escribiron algunhas das súas obras durante as súas estadías en Cambados.

Pola vila de Cambados discorre ademais un dos oito camiños de Santiago, “A Ruta marítimo-fluvial pola ría de Arousa e o río Ulla”. Esta conmemora a chegada, por mar, do corpo do apóstolo Santiago tras o seu martirio en Xerusalén, no ano 44.

O itinerario marítimo comeza na entrada da ría de Arousa e finaliza en Pontecesures e Padrón enlazando aquí co Camiño Portugués ata Santiago de Compostela.

O sector vitivinícola é un dos principais dinamizadores da economía do Salnés, onde case cinco mil familias viven do cultivo de albariño, un dos produtos agrícolas máis exportados da nosa terra.

Cambados é coñecido como a “Capital do Viño Albariño” e é que todo nesta vila nos lembra o “principe dourado dos viños” como o denominou Álvaro Cunqueiro, sendo punto de partida da Ruta do Viño que acolle vintedúas adegas pertencentes á Denominación de Orixe Rías Baixas. Conta ademais co primeiro museo Etnográfico e do Viño en Galicia e un dos primeiros de España, e ca estatua en bronce do deus do viño na mitoloxía romana Baco, do escultor Francisco Leiro.

Aquí celébrase un dos festexos enogastronómicos máis antigos de España pois cada primeira fin de semana de agosto ten lugar a Festa do Viño Albariño, fundada en 1953 e declarada de Interese Turístico Nacional. Ao longo dunha semana de festexos danse cita concertos de grupos nacionais e internacionais, diferentes eventos lúdicos, deportivos e culturais.

A gastronomía cambadesa está recoñecida como unha das mellores de Galicia, pois é un lugar ideal para comer, cear, tapear… Combinar o afamado viño albariño coa calidade dos mariscos e peixes frescos, xunto cos produtos da horta, fan da súa hostalería  unha aposta segura pola exquisitez.