Cambados pechou o Nadal máis Solidario

Cambados pechou o Nadal máis Solidario

O Concelleiro de Servizos Sociais, Sanidade e Terceira Idade de Cambados, Tino Cordal, amosa a súa satisfacción polo éxito da campaña de Nadal que serviu para recoller alimentos non perecedeiros, típicos do Nadal, produtos de hixiene corporal e xoguetes novos ou en bo estado de uso. A maiores o Concello tamén gastou máis de 5000 euros para distribuír alimentos e xoguetes entre as familias necesitadas de Cambados.

Na IV Carreira San Silvestre Solidaria de Cambados do 31 de decembro, o Club Atletismo de Cambado recolleu máis de 600 quilogramos de alimentos non perecedeiros, aproximadamente, e varias ducias de xoguetes. Tamén se recolleron varias ducias de peluches no partido do Club Xuventude de Baloncesto celebrado no pavillón do Pombal o pasado 29 de decembro.

A recollida de xoguetes efectuada nas dependencias de Zona Centro e dos propios Servizos Sociais do Concello situadas no edificio de oficinas e servizos municipais da rúa Ourense foi algo máis abundante, pois neste caso superouse o medio centenar de xoguetes, recolléndose dende 2 bicicletas, varios coches eléctricos, unha cociña de xoguete, patíns e libros, entregándose nalgún caso mesmo xoguetes novos e cos precintos sen abrir. Os xoguetes novos ou en bo estado de uso foron entregados ás familias necesitadas de Cambados nos días previos á chegada dos Reis Magos. Segundo Cordal, “tratamos de evitar que ningún neno ou nena de Cambados quedara sen xoguetes, independentemente da precariedade da situación económica da súa familia”.

O Concelleiro de Servizos Sociais, Sanidade e Terceira Idade de Cambados, Tino Cordal, agradécelle á Asociación de Comerciantes Zona Centro, ao Club Atletismo de Cambados e ao Club Xuventude de Baloncesto a súa colaboración nesta campaña solidaria do Nadal.

Cordal considera ademais que “entre os obxectivos desta campaña do Nadal tamén estaba transmitir á poboación cambadesa valores como a solidariedade entre veciños, sobre todo nos casos en que existen necesidades evidentes”. “Ser bo cidadán implica ser solidario e axudar aos teus veciños cando o precisan, e non só durante as festas do Nadal”.

Logo desta campaña solidaria do Nadal o Banco de Alimentos do Servizos Sociais de Cambados está practicamente cheo, tendo existencias para repartir entre as familias máis necesitadas do noso Concello durante varios meses. En definitiva, todo un éxito.

Deixa unha resposta

O teu enderezo electrónico non se publicará Os campos obrigatorios están marcados con

This site uses Akismet to reduce spam. Learn how your comment data is processed.